Foreldranámskeið talmeinafræðinga á Suðurlandi.

Laugardaginn 30. maí sl. héldu talmeinafræðingar á Suðurlandi (Anna Stefanía Vignisdóttir, Álfhildur Þorsteinsdóttir, Hólmfríður Árnadóttir, Sigríður Arndís Þórðardóttir og Þóra Sæunn Úlfsdóttir) námskeið fyrir foreldra barna með málþroskaröskun. Námskeiðið var haldið í Vallaskóla og styrkt af skólaþjónustu Árborgar og Málefli, hagsmunasamtökum barna með málþroskaraskanir. Fjallað var um eftirfarandi atriði: – Hvað er málþroskaröskun? – Hvað geta foreldrar gert til að örva málþroska barna sinna? – Mikilvægi lesturs og hljóðkerfisvitundar. Eftir námskeiðið var tími fyrir spjall og komu talmeinafræðingar með þjálfunargögn, spil, bækur o.fl. sem foreldrar gátu skoðað og lært hvernig nota má efnið með börnunum. Almenn ánægja var með námskeiðið hjá þátttakendum og er það liður í eflingu foreldrafræðslu á svæðinu.

Tekið af síðu sveitarfélags Árborgar.

Foreldravefurinn hjá Reykjavíkurborg

Á vefsíðu Reykjavíkurborgar er að finna síðu sem kallast Foreldravefurinn. Þar inni er hægt að finna mikið magn af upplýsingum fyrir foreldra sem snúa að dagforeldrum, leikskóla, grunnskóla, frístundastarf og heilsu og næringu. Einnig er hægt að lesa sér til um málörvun og lesskilning barna.  Þar eru settar fram ýmsar leiðir fyrir foreldra til að hjálpa börnum sínum í að örva málið og læra að lesa.

Við hjá Málefli fögnum því að það sé hægt að leita sér að hnitmiðuðum upplýsingum á einum og sama staðnum og hvetjum við því flesta foreldra til að kíkja á síðuna HÉR og skoða hvað hún hefur upp á að bjóða.

Aðalfundur Máleflis

Aðalfundur Máleflis verður haldinn mánudaginn 27. apríl kl. 19:30.

Staðsetning : Dunhagi 7, 107 Reykjavík – Endurmenntun Háskóla Íslands.

Dagskrá:

  1. Venjuleg aðalfundarstörf
  2. Kynningar :
  • Leikum og lærum með hljóðin – app – Bryndís Guðmundsdóttir talmeinafræðingur
  • Sjö spilastokkar – þjálfun hljóðkerfisvitundar – Ásthildur Bj. Snorradóttir talmeinafræðingur
  • Að vera velferðarvörður barns með málþroskaröskun – Jóhanna Guðjónsdóttir móðir barns með málþroskaröskun og sérkennari

Hér er gott tækifæri til að fræðast um og kynnast starfi Máleflis.

Allir hjartanlega velkomnir.

Hvað fékkstu á prófinu?

Málefli var boðið að taka þátt í málþingi um skólamál þann 8. september 2014 og héldu þær Þóra Sæunn talmeinafræðingur og Fjóla Heiðdal foreldri fyrirlestur um börn með málþrosakaraskanir innan skólakerfisins. Þetta var einkar góður vettvangur til að koma á framfæri hvað talmeinafræðingar eru góð tól til þess að hjálpa þessum börnum og einnig að koma á framfæri hvað það er sem foreldrar krefjast af skólakerfinu fyrir börnin sín. Fyrirlesturinn má sjá í heild sinni hér fyrir neðan.

 

Málþing Thora from Samband islenskra sveitarfelag on Vimeo.

Kaffihúsahittingur foreldra

Á síðasta foreldranámskeiði fundum við fyrir því hvað foreldrar og aðstandendur innan félagsins þurfa svigrúm og vettvang til að ræða saman um það sem þau eiga sameiginlegt. Að eiga barn eða ungmenni með tal eða málþroskaröskun. Þessvegna langar okkur að halda kaffihúsakvöld þar sem þið eruð velkomin að koma í þægilega stemningu og spjalla saman 🙂 Frábær leið til að deila reynslusögum, leita eftir ráðum og fá að vita að maður er ekki alveg einn í þessu öllu saman 🙂

Við ætlum að hittast á Café Meskí í skeifunni kl 20.00 og býður Málefli upp á smá kaffi og veitingar 🙂 Hlökkum til að sjá ykkur!

Fyrsta námskeiðið Mál er Máttur á vegum Máleflis heppnaðist vel

Þann 25.október síðastliðinn var haldið fyrsta námskeiðið á vegum Máleflis, „Mál er Máttur“ til eflingar foreldrum barna með málþroskaraskanir.  Sjá má auglýsinguna hér.  Breyta þurfti staðsetningu vegna mikillar aðsóknar og námskeiðið var haldið í Norðlingaskóla í Norðlingaholti.  Kynning á spilum og leikjum var einnig efld til muna og sett var upp eftirfarandi fræðsluhringekja fyrir foreldra í síðasta hluta námskeiðsins:

  1. Þóra Sæunn Úlfsdóttir og Tinna Sigurðardóttir talmeinafræðingar kynntu ýmis spil sem þær nota í talþjálfun barna.
  2. Spilavinir kynntu spil sem henta við málörvun barna.
  3. Anna Margrét Ólafsdóttir frá paxel123.com kynnti samnefndan verðlauna vef.

Það komust færri að en vildu og þótti námskeiðið hafa heppnast mjög vel.  Sjá má hér heildarniðurstöðu könnunar sem sýnir okkur heildarmat þeirra foreldra sem sátu námskeiðið.

malermattur

Námskeiðið heppnaðist mjög vel að mati Máleflis og foreldra en alltaf má gera betur og munum við hafa það að leiðarljósi fyrir næsta námskeið. Málefli var t.d. ljóst að gera þyrfti ráð fyrir tíma þar sem foreldrar gætu deilt sinni reynslu, fengið ráðleggingar frá öðrum foreldrum og fagfólki námskeiðsins.  Stefnan er einnig sett á að reyna komast á móts við fólks á landsbyggðinni með einum eða öðrum hætti.  Látum hér fylgja nokkrar myndir frá námskeiðinu.

agust2014-205 agust2014-207 agust2014-212 agust2014-214  agust2014-215agust2014-224 agust2014-227

 

Tilnefning til Hvatningarverðlauna ÖBÍ 2014

Veitt eru verðlaun í þrem flokkum. Flokki einstaklinga, flokki fyrirtækis/stofnunar og flokki umfjöllunar/kynningar.

Tilnefna má í einn, tvo eða alla þrjá flokkana.

Lokadagur tilnefninga er 15. september 2014.

Þjónustusími Máleflis opnaður

Málefli hefur opnað símann 841-7961 sem er opinn öllum sem hafa spurningar sem varða börn og ungmenni með tal og málþroskaraskanir. Þeir sem hringja í símann þurfa að leggja inn nafn, erindi og símanúmer í talhólfið. Stjórn félagsins skiptist á að svara í símann og hefur að markmiði að hafa samband við fyrirspyrjendur innan þriggja virkra daga. Það er von félagsins að þessi nýjung mælist vel fyrir.

Málefli